ازيكم يا شباب ويا بنات ، يا فتيان ويافتيات << حلوة مش كدا
المهم الموضوع الى انا عاوز اطرحه عليكم
بقالي فترة كل ما بدخل المنتدى واشوف مواضيع جديدة او قديمة الاقي اغلب المواضيع سواء من الشباب او البنات بتتكلم عن الحب ، ومش عارف ليه يعني ماسكين في الحب بالطريقة دي
ادخل موضوع والاقي بنت ميتة جوا الموضوع وعاملة نياحة عشان حبيبها سابها ، في ستين داهية هو سابك ليه ؟؟
هل انتي وحشة مثلا ؟ وللا قرعا ؟ وللا كل ما تقابليه بتكوني ماسكة لو السكينة ؟
خلاص يختي طلاما سابك دوري على غيره والى يبيعك بعيه واذا رجع لك موتيه وبلاش تكتبي لنا موضوع لازم نجيب حلة عشان نكب فيها الدموع عليكي انو سابك ،، هو الحب بيشتروه ؟
المشكلة الاكبر من كدا اني الاقي شاب لطيف خفيف ظريف عنيف
شنبو خط على بوزو ولو جوزوه حيخلف ويجيب كتاكيت صغيرة ، والاقيه عامل موضوع وبيسأل فيه :
اخوتي واخواتي الفاضلات ، هل الحب حرام ؟
هل نستطيع ان نعيش بدون حب ؟
هل الانسان يحب ويكره ؟
هل اذا حبيت البنت حتحبني ؟
هل اذا البنت حبتني ممكن تسيبني ؟
^
^
لا يا شيخ
بزمتك مش مكسوف من نفسك وانتا بتقول كدا
دا انتا الى قدك فتحو بلاد وقادو جيوش وانتا مش مكسوف من نفسك وانتا بتقول بتحبيني وللا ما بتحبينيش ؟
ياخي جاتك نيلة انتا وهيا ،
طيب ربنا قدركوا وحبيتوا بعض ، خلاص ما تفضحوش بعض مش ناقص الا كل واحد يكتب موضوع عشان يقول للناس ، يا ناس انا بحب فلانة ، وهيا تجري على صحبتها وتقولها فلان بيحبني وصاحبتها بقى عليها نشر الخبر ،
يقطع الحب وسنينه
دوروا على مواضيع مفيدة تفيدكم في حياتكم ونضفوا ادمغتكم من الكلام الفاضي دا بقى يعني ما تخلوش الكلام دا هو الشاغلكم أوي ، وكأن الدنيا خلاص خلصت من كل حاجة الا الحب
كفاية كدا ...