انتفض قلبي بغزال منصوري القصة (يصعب فتح الموضوع) 11

يته مسج ..
" انا بنت .."
اول ما قراها مبارك عرفها .. هذي اكيد منى ..
رد عليها ..
" اها .. السموحه منج ياختيه .. "
ردت
"مسموحه .. بس ممكن أسألك سؤال لو سمحت ؟؟.."
رد عليها ..
"تفضلي الشيخه .."
ردت ..
"شو فيك .. انت من اسبوع مب طبيعي "
سكت مبارك .. اللحين هذي شو اقولها .. ؟؟.. تأخر مبارك عليها بالرد ..
طرشتله ..
"السموحه ان كنت ظايقتك بسؤالي .. او اني تدخلت في شي من خصوصياتك .. بس و الله مستهمه عليك و احاتيك "
و في هاللحظه اتصلبها مبارك .. تأخرت منى .. بعدين ردت عليه ..
مبارك : الو ..
منى : الو .. مرحبا ..
مبارك : مرحبا الساع .. شحالج .؟؟..
منى : بخير .. انت .. شحالك ؟؟..
مبارك : الحمد لله ..
تمت منى ساكت و مبارك ساكت .. انا ليش اتصلت بها .. ؟؟!!..
منى : امممم ... رب ماشر ..؟؟؟..
مبارك : ماشر الشيخه ..
منى : لا انا حاسه ان فيك شي مب طبيعي .. انت من اسبوع متغير ..
مبارك : مب من شي ..
منى : لا مبارك .. انا حاسه ان شي استوالك .. لا و شي عود بعد و مب هين ..
سكت مبارك .. و تمت منى ساكته على امل ان مبارك يرمس ..
مبارك : ... وصلني خبر كدرني ..
منى : اممممم ... و رمسه وصلتك ممكن تسوي فيك هالشي ؟؟!!..
مبارك : لانج ما تعرفين هالرمسه الي وصلتني .. هاالرمسه ذبحتني .. خلتني جسم ٍ بلا روووح .. انسان متحطم ..
منى : بسم الله عليك .. ليش تقول هالكلام .؟؟..
سكت مبارك ..
منى : امممم .. ممكن اعرف هالخبر .. و الا بتعتبره تعدي على امورك الخاصه ؟؟..
مبارك و هو مغمض اعيونه و يتنهد : اااااه ... الانسانه الي احبها .. روح قلبي .. كانت ملجتها من اسبوعين ..
انصدمت منى من الرمسه .. انصدمت من كون مبارك يحب .. و انصدمت اكثر كون الانسانه الي يحبها صارت ملك انسان غيره .. خنقتها العبره .. يالله فديته .. ما عرفت شو تقوله ..
مبارك : شفتي .. ما تعتقدين ان هالموضوع يستاهل اني اتكدر عشانه ..؟؟..
منى : انت تحبها ..؟؟..
مبارك : امووووووووووووووووووووووووووت عليها ..
منى و هي تنذبح بكل همسه يهمسى مبارك في هوى حبه لروضه ..
منى : .. و ليش ما خطبتها ..؟؟.
مبارك : كنت بخطبها .. بس استوى حادث راشد .. و من عقب سافرنا .. و كنت بخطبها اول ما ارد البلاد ..
منى : بس مالك نصيب بها ..
مبارك : لا مستحيل .. ما اتخيل روضه لريال غيري ..
منى و ذابحتنها الغيره من روضه .. يالله .. لهالدرجه يحبها ؟؟!!..
منى : و هي تحبك ..؟؟.
مبارك : اكييييييييد ..
منى : لو كانت تحبك .. مستحيل انها تاخذ واحد غيرك .. او عالاقل بتقولك قبل لا تملج .. مب عقب الملجه بترمس ..
مبارك : انتي شو تقولين .. هذي روضه .. مستحيل انها تخوني بهالطريقه .. انا و الكل يعرف ان روضه ما تبى هذا الي خطبها .. بس المشكله في هلها .. هم الي غصبوها ..
منى : انزين .. هي ليش ما قالتلك ..؟؟.
مبارك : لاني ما اكلمها ..
انصدمت منى .. ما يكلمها و يحبها هالحب كله ..؟؟!!!!!!!!..
منى : و كيف عيل عرفت انها تحبك ..؟؟؟.
مبارك : في اشياء ما ينطقبها اللسان .. بس تنطقبها العيون .. تنطقبها رعشت الايد .. ..
و تم مبارك يتكلم عن روضه .. كان مبارك متظايق .. و لا حس بعمره انه يرمس وحده غريبه .. و ما يعرفها .. بس هو ارتاح بالرمسه مع منى .. و منى كانت تموت في كل كلمه ينطقها مبارك عن روضه ..
منى : يا بختها .. اذا انت تحبها كل هالحب ..
مبارك : منى .. تعرفين روضه شو في حياتي ؟؟؟.. روضه .. قطرة ماي تروي الظميان .. و المشكله .. ان الظميان ما يرتوي منها و لو عاش سنين ..
و في هاللحظه نزلت دمعة مبارك .. تيبست منى .. هي ما سمعت مبارك يصيح .. بس حستبه .. حست ان مبارك يعيش معاناه هو انظلم فيها .. ما قد تخيلت ان مبارك ممكن يصارحها بهالكلام .. او حتى يكملها ... ليته ما كلمني .. و لا قالي .. سكر مبارك عن منى .. و خرت عينه و هو مب حاس .. و منى .. جافاها النوم .. و دمعتها على خدها .. تصيح حالها .. يعني انا يوم حبيت حبيت انسان يحب وحده غيري .. لا و مب أي حب .. حب مستحيل انه يطلع من فواده .. و صاحت حال مبارك .. يالله يالقدر ..
بعدها بيوم رجعو قوم مبارك البلاد .. و كان يوم الثلاثا الفير .. و نزلو على مطار دبي .. و راحو رماح .. يوم الثلاثا العصر راح مبارك الوكاله يسحبله سياره يديده من الوكاله بدل الرنج .. و يوم الاربعاء كانو مسوين عزيمه عردت راشد بالسلامه .. و يوهم قوم خالته و خاواله و عمومته كلهم .. و سال مبارك شما عن روضه .. و قالتله انهم في ليوا ... يحظرون عرس بنت عمتها .. ما قدر مبارك انه يمسك عمره اكثر .. من شهر و هو يعدي بروضه .. و مستحيل انه يصبر اكثر .. اتصل بسلطان .. الي دلل مبارك على محاظره الي في ليوا .. و يوم الخميس العصر .. كان مبارك يسير صوب ليوا .. و تلقاله سلطان في نص الدرب ... لان مبارك ما قد راح صوب ليوا و هذيج المنطقه .. و توهم واصلين مزرعة قوم روضه .. كانت يدت روضه و روضه و بنات عمها و عمتها و بنات ييرانهم يالسات عند يدتها .. و كانن فارشات برى البيت و يالسات .. افترت شمسه بنت عمة روضه صوب سلطان و مبارك اول ما دخلو عليهم المزرعه ..
شمسه : يا ويل حالي .. طاعن هالرنج الرصاصي ..
و افترن كلهن صوب السياره .. و كان مبارك .. الي اشتراله رنج رصاصي يديد بدال رنجه الجديم ..
اول ما شافته روضه عرفته .. وقف قلبها .. فديييييييييييييييييييييييييييييييييييييييت رووووووووووحه من الخاطر ..
يدت روضه : .. منو هذا الي يسير صوبنا بسيارته ..؟؟؟..
روضه : يدوووه ... هذا مبارك بن حمد ..
يدت روضه : مرحبا الساع ..
كان مبارك بعده ما وقف .. بس من شاف لمت البنات عرف روضه .. يالله فديت روحها .. اول ما وقف مبارك .. طول على المسجل و كانت غنية ميحد يا طارشي ..
( يا طارشي ود السلام و رده.... للي عيونه و الهدب مسوده .. غالي و يتزايد بقلبي وده ..)
نزل مبارك بعصاته من السياره .. و تم ايول و ايسوي حركات .. و يدت روضه ميته ..
يدت روضه : عاشوو .. ياااابس ..
و البنات منصدمات من حركة مبارك .. و سلطان اول ما شاف مبارك ايول .. نزل الحبيب بعصاته هو بعد و تم ايووول و ايبس مع مبارك ..
و يوم يا هالمقطع ..
(يالي شرى البراق يسني خده .. احيى بشوفه و الهلاك من بعده .. و ان عادلي يافرح قلبي و سعده ..)
تم مبارك يحرك عصاته .. كأنه يأشر على البنات كلهن .. و من عقب اشر بعصاته على يدت روضه .. الي كانت يالسه عدالها روضه .. كأنه يقولهن ان هاليوله حق يدت روضه ... بس هو و روضه و ميثه بنت عمها .. كانو يعرفون منو المعناي بهاليوله ..

..*** ماشي فالكون عن شوفته يمنعي... الا النظر لو يفارق مقلت اعياني... من دون ما اشعر له الاشواق تدفعني... و اظن حتى بحلم النوم يلقاني ***...

اول ما خلصت الغنيه .. تحرك مبارك صوب يدت روضه عشان يوايها .. اول ما شافنه البنات يمشي صوبهن نشن ..
يدت روضه : مرحبا الساع .. مرحبا الساع .. وايه فديت هالعرضه ..
مبارك : السلام عليكم ..
البنات : و عليكم السلام ..
الكل رد سلامه .. عدا روضه ..الي من شافت مبارك ما قدرت انها تتنصخ بشي .. و الله اني احبه .. و مبارك يمشي صوب يدت روضه .. و لا اراديا طالع روضه .. كان مبارك لابس كندوره كركميه و سفره تقريبا من نفس اللون .. كان عذاب .. اول ما شافته روضه عورها قلبها على حالها و على حال مبارك .. مشى مبارك و سلم على يدت روضه و وايها و حبها على راسها .. و افتر صوب روضه الي كانت واقفه على الطرف اليمين ليدتها .. يالله فديتها .. كانت روضه واقفه و هي متغشيه بهيبتها .. اول ما شافها مبارك .. تذكرها و هي تمشي في السكه .. اول مره يشوفها فيها .. و الله صدق هالانسانه بتذبحني .. و في هاللحظه حس جن حد يطعنه في قلبه .. و افتر عن روضه بسرعه ..
يدت روضه : مرحبا الساع ..
مبارك : المرحب باجي يالغاليه .. شحالج ربج الا بخير ..؟؟؟.
يدت روضه : بخير يعني افدى روحك .. الا هالركب لعوزتنا ..
مبارك : ما تشوفين شر يالغاليه ..
يدت روضه : الشر ما يصيبك ..
اشر سلطان لروضه و البنات عشان يحدرن .. جان ينشن و يحدرن .. و مبارك عينه ما طاحت عن روضه ..
شمسه : فقتج يا ميثه ..
ميثه : فقتج الا انتي .. شعندج ..؟؟؟.
شمسه : لو ما انتي عندنا .. ما خلانا سلطان ندخل ..
روضه : ليش شمووووس ..؟؟.. انتي كنتي تريدين تيلسين في نص الرياييل ..؟؟..
شمسه : حرام عليكن .. خلني اكحل اعيوني بهالشوف ... حشى هب رحامه فيه ..
موزه : امبونه مبارك ما يخرب ..
شمسه : اكيد ما يخرب ..
روضه : انتن ليش تطرن الرياييل ..؟؟؟.. عيب عليكن ..
موزه : لا هب عيب علينا .. احنا بنات و من حقنا نتشوف فمخاوين شما .. بس انتي و ميثوه مب من حقكن ..
شمسه : هيه و الله .. كل وحده منكن وراها ريال ..
روضه : جنج الا بغيتيه تراها واصل ..
شمسه : ههههههههههه .. اوين واصل .. خلي عنج .. ماظني بتفرطيبه بخيت ..
موزه : ليت مريوووووم عندنا ..
ميثه : ليش ..؟؟..
موزه : ترى مريوم ميته على مبارك .. و الله لو شافته و هو ايول .. لا تموت .. ههههههههههههههههه ..
روضه و الغيره ذابحتنها : موزه .. عيب عليج .. انتن بناات عرب و جبايل .. و عيب عليكن هالرمسه و هالحركات ..
شمسه : انزين انتي ليش معصبه .. هدي اعصابج .. الي يشوفج يقول ريلج ..
ليت صدق .. اااااااااه ياقلبي ..
و في هاللحظه سمعن المسجل .. و كانت شلة راكان ..

بحظر زفافك يا حياتي .. بحظر زفاف الي هويته ..
و برزف عشانك لا تحاتي .. و بهديك كل الي بغيته ..
بهديك دمعي و اعبراتي .. و الهم لي فيني رميته
بحظر و لو بعرسك مماتي .. شايل معي قلب ٍ نسيته
و اجمل قديم الذكرياتي .. و الظيم لي منك خذيته
و بذكر ليالي الماضياتي .. كنت الوليف الي اهتويته
كنت الذي لاجله اباتي ..ساهر و نومه ما اهتنيته
بهديك في ليلة وفاتي .. حلم الليالي لي طويته
و اعطيك من قلبي امنياتي .. تلقى الهنى بدرب ٍ مشيته
و تعيش في راحه و سباتي .. ويّى الذي عقبي لقيته
بحظر زفافك يا حياتي .. بحظر زفاف الي هويته

ماتت روضه من سمعت هالشله .. هي عرفت قصد مبارك من وراها .. يالله يعني مبارك يدري .. و مع هذا ياني الين ليوا .. يالله فديته .. خنقتها العبره من سمعت الشله ..
سلامه : سمعن سمعن ..
و تمن البنات يسمعن الشله الين ما خلصت ..
شمسه : امممممممممم ... رهيب راكان ..
موزه : الا عذااب ..
حاولت روضه انها تمسك عمرها .. بس ما قدرت .. كل الي قدرت انها تسويه .. انها تنش عن البنات و تدخل داخل .. ميثه كانت منتبه لحركت مبارك .. و حست بعذاب روضه .. بس ما بيدهن شي ..
شمسه : شعندها روضه خلتنا و راحت ..؟؟؟..
موزه : اكيد راحت تتصل بشمامي ..
سلامه : ما ادري .. انا ما ارتاحلها هذي شما ..
ميثه : لا اله الا الله .. خاطريه لو مره وحده ما تذمن فيها بنت .. حشى اسميكن تنتفن البنات نتاف ..
موزه : لا بسم الله عليه .. ما قد طريت حد الا بالزين ..
شمسه : يالله عليج يا طويز .. يعني احنا الي نطري البنات بالشين ..؟؟.
و يلسن البنات بين السوالف و الطنازه و الوجعه ..
و روضه يالسه في حجرتها .. هي استحملت فكرة انها ممكن تكون حرمت بخيت .. بس هالشي قبل لا تشوف مبارك .. بس من شافت مبارك .. كرهت حياتها .. و تمنت موتها مية مره قبل لا تكون لواحد غيره .. بس خلاص .. الله ما كتبلها بنصيب مع مبارك ..
و في هالوقت اتصل مبارك بواحد من ربعه ..
فاضل : مرحبا ملاييييييييييييين .. حيبه ..
مبارك : افا الا ملاييييييييييين ؟؟!!!.. ترني رخيص عندك يالمزروعي ..
فاضل : اذا انت رخيص من الغالي يالغالي ..؟؟..
مبارك : جاد ربك وحده من هالغراشيب اتكون اغلا مني عندك ..
فاضل : ااه .. اسميك ييت عالعوق ..
مبارك : هههههههههههههه .. بتموت و عينك عالبنات ..
فاضل : شو اسوي ما اصبر عن السوده .. ههههههههههه
مبارك : هههههههههههههههههههه ..
فاضل : علومك يالمزيون ؟؟..
مبارك : تنشد اعلومك و الله ..
فاضل : يا ويل حالي ..
مبارك : عاد لا تصدق عمرك ..
فاضل : ههههههههههههههههه .. انا تشققت .. قلت رحمني الخييلي اليوم ..
مبارك : لا وين ارحمك و انت مزروعي ..
فاضل : ياخي شعندك عالمزاريع .. ما كلين حلالك ؟؟..
مبارك : لا حبيت مزروعيه و خانتني .. هههههههههههههههههههه..
فاضل : اسميها اجدت في لحيتك .. ههههههههههههههه
مبارك : عنلات صداك .. وين اجدت في لحيتيه ..؟؟؟.. هي ودها مبارك بن حمد يفتر صوبها ..
فاضل : هههههههههههه .. الله لا بليتنا يالخقاق ..
مبارك : هههههههههههههه .. شو اسوي خييلي و الخقه الا من عقبنا ..
فاضل : هههههههههههههه .. وين دارك ..؟؟.
مبارك : في دارك ..
فاضل : في ليوا ؟؟؟!!!...
مبارك : هيه نعم ..
فاضل : و انا اقول الدار منوره ..
مبارك : ما نارت الا بوجودك يالغالي .. هاه وين بنلاقيك ..؟؟؟.
فاضل : عشاك عندي الليله ..
مبارك : لا السموحه منك .. بنسير صوب عرس في المدينه ..
فاضل : خلاص عيل .. دام انك في ليوا طوف علينا .. لو بتتقهوي ..
مبارك : ياخي ما ادل في ليوا ..
فاضل : محد عندك من الشباب ..؟؟؟..
مبارك : لا عندي سلطان المنصوري ..
فاضل : خلاص عيل هو بيدللك .. قوله محاظر المزاريع .. الماريا .. و هو بيوصلك صوبنا .. و انا بترياكم عند حدرت المحظر ..
مبارك : خلاص عيل ..
و راح سطان و مبارك صوب فاضل .. الي تلقالهم في حدرت محاظرهم .. و راحو صوب بيتهم .. و قربهم فاضل في الميالس ..
و هم يالسين طرشتله منى مسج ..
" رقبتك اليوم اطرشلي مسج .. بس ما وصلني لا علم و لا خبر .. رب ما شر "
رد عليها ..
" ما من شر الغاليه .. بس انا في ليوا عند الرياييل .. و من عقب بنخطف صوب عرس في المدينه "
و ردت عليه ..
" اها .. السموحه ان كنت غثيتك .. بس من تفضى طرشلي مسج ^ــــ* "
و توه بيرد عليها .. جان يفضي تيلفونه ..
مبارك : لا حووول ..
سلطان : شعندك ..؟؟؟...
مبارك : تيلفوني فضى ..
فاضل : و انت ما تصبر عنه ..
مبارك : ليش قالولك فاضل المزروعي ..
فاضل : هههههههههههههه .. لا مبارك الخييلي ..
مبارك : جب جب .. لا افلعك بهالفنيال بين عيونك ..
فاضل : هههههههههههههههه .. كل هذي غيره مني يوم اني احلا من سودتك !!..
مبارك و هو ينش و ياخذ ماي بالفنيال الي في ايده من الغسول : انا اسود يالخام .. ( و يرش فاضل بالماي ) ..
فاضل : حووووووووووووووه .. هههههههههههههههههههههههه ..
مبارك و هو واقف : مزروعي ما تنعطى ويه ..
سلطان : ههههههههههههههههههههههههه ... حمد ربك يوم ان الي فالفنيال ماي هب قهوه .. ههههههههههه
مبارك : ههههههههههه .. لا ما يهون عليه احرقه .. هو جذيه و هب لاقي حد يعطيه ويه .. وين لو هو محروووق .. هههههههههه .
و نش عنهم مبارك ..
سلطان : وين بها ..؟؟...
مبارك : برووح احط التيلفون في الجراج ..
و ظهر عنهم مبارك من الميالس صوب سيارته .. ركب سيارته و حط تيلفونه في جراجت السياره و تم شوي في السياره .. و طرش لمنى مسج .. و هو يالس سمع حشرت بنات .. بس ما شاف حد منهن .. شوي و رجع مبارك صوب الشباب .. و هو في طريجه صوبهم .. يته مسج .. جان يوقف و تم يقرى .. فجأه ان وحده ظاهرتله من المطابخ .. و كانت شيلتها على جتوفها ..
العنود : اااااااااااااااااااااااااااااااااااااااااااااا... بغمت العنود بغمه .. حشى ونان ..
استلبس مبارك .. ما عرف شعندها .. و هي من شافت مبارك ربعت .. انزين كان المطبخ اقربلها .. بس هي من الربشه ربعت اللين البيت لا و لا عدلت شيلتها بعد.. و مبارك مسكين فاج ثمه .. حشى شعندهن البنات استخفن ..دخلت العنود و هي تربع على خاواتها ..
هند : شبلاج ..؟؟..
العنود : لحقن ..
حمده : شو بلاج ..؟؟.. فاضل ظربج ..؟؟؟..
العنود : هو لو درى مب الا بيضربني .. الا بيذبحني ..
هند : ليش ترج شو سويتي ..؟؟؟..
العنود : ماشي و الله .. كنت ظاهره من المطبخ و ان واحد من ربع فاضل في ويهي ..
هند : اااااا .. قولي و الله ..؟؟.. يا ويلج من فاضل ان درى ..
العنود : حرام عليج هندووه .. انا بدون شي اتحرقص .. لا تزيديني ..
حمده : حلو ؟؟..
العنود : يابوج من الزيغه ما تفطنت في شكله .. شليت عمري و ربعت ..
هند : هههههههههههههههههههه ..
راح مبارك عند الشباب في الميالس .. و عقبها بشوي ظهرو بيروحون العرس ...
حمده : تعالن تعالن شوووفن هالزين كله ..
و ربعن البنات يوايج عالشباب و هم ظاهرين من الميالس ..
العنود : هذا هذا ..
هند : أي واحد ..؟؟؟..
العنود : الي لابس كندوره كركميه ..
حمده : قولي و الله ؟؟.. يا ويل حالي .. انا ان ريت هالريال ما بروم اشل عمري ..
هند : حمدووووووه .. لحقي سيارته رنج ..
حمده : لا و تحت التجربه بعد .. يالله .. ظنكن معرس ..؟؟..
العنود : ليت فاضل يشوفكن و انتن توايجن ..
راح مبارك و سلطان و لمت شباب عرس بنت عمة روضه في المدينه .. و تأخر و الوقت .. و حلف سلطان عمبارك انه يبات عندهم .. بس مبارك ما طاع .. ما قدر انه يكون في نفس البيت الي فيه روضه ... رجع مبارك رماح ..و هو في الدرب طرشتله منى مسج ...
" شو بعدك في ليوا ؟؟ "
رد عليها ..
" لا انا في الدرب اسير صوب رماح "
ردت عليه ..
" اول ما توصل البيت طرشلي مسج .. تراني ما بنام بترياك "
رد عليها ..
" لا ترقبيني .. نامي .. جاد ابطي "
ردت عليه ..
"ما بنام الين ما تخبرني انك وصلت .. بترياك "
رد عليها ..
"انشالله "
من ذاك اليوم الي كلمت فيه منى مبارك .. و هم دوم يطرشون لبعض مسجات .. هو ما كلمها من بعد ذاك اليوم الا مره وحده .. اتصلتبه منى اول ما وصلو البلاد تتحمدله بالسلامه .. بس 24 ساعه المسجات شغاله من بينهم .. و لقى محمد خوه و عياله عندهم بس كانو نايمين ... وقف مبارك سيارته و تم يسمع المسجل شوي قبل لا ينزل البيت .. و طرش لمنى مسج ..
" الغاليه تراني وصلت رماح "
ثواني و ان منى مطرشتله ..
" الحمدلله .. انورت رماح "
رد عليها ..
" ههههههه .. دومها منوره "
منى ..
"لازم مب مبارك بن حمد من هلها لازم بتكون منوره "
مبارك ..
"هذا من طيب اصلج "
منى ..
" يله اللحين روح و نام و ارتاح .. دقيت خط من ليوا لرماح "
مبارك ..
"انشالله .. و انتي بعد .. تصبحين على خير "
منى ..
"و انت من اهله "
مرت الايام و مبارك مب عارفله حل .. هو يحب روضه .. بس ما يقدر انه يسوي شي .. خطر في باله انه يرمس بخيت .. بس خاف لا بخيت يرمس و يقول ان شي من بين مبارك و روضه .. و خاف على روضه من رمست العرب .. كان في خاطره يسوي اشياء وايده .. بس حشمت هله و حشمته لروضه منعته من هالشي .. خلاص فقد مبارك أي امل له في روضه .. و خاصتن من بعد ما رمسه سلطان عن بخيت ريل روضه.. هو البجر .. يشتغل في جازكو في بوظبي .. ما يرد لهله في الخزنه الا في الاجازات .. ما كان يكثر من الروحات صوب قوم روضه .. و روضه اللين الحين ما شافته .. و لا تريد انها تشوفه .. حس مبارك من رمسته عند سلطان انهم يبون بخيت .. و انه ريال حشيم .. بس حتى .. مستحيل انه يحب روضه مثل حبي لها او حتى 1% من حبه لروضه .. بس ما بالايد حيله .. هذا القدر و انكتب عند ربي ..
راشد : مبارك .. خلاص .. خاف ربك في عمرك ..
مبارك : ادري يا راشد .. الا مب قادر اني انسى روضه ... ما اقدر اتخيلها عند ريال غيري ..
راشد : بوحمد .. روضه صفحه و انقظت في حياتك ..
مبارك : هي صفحه .. بس مستحيل انها تنقظي من حياتي .. روضه هي حياتي ..
راشد : مبارك .. انساها .. و تمنالها الله يوفقها في حياتها ..
مبارك : انساها ..!!!!..
راشد : لو كنت تحبها صدق .. صدقني بتتمنالها الخير في كل خطوه تخطيها في حياتها ..
مبارك : اااااااااه .. والله اريد ادعيلها بالخير..بس..ما استحمل .راشد.تخيل..والله مب قادر اني اعيش..ليتني مت قبل لا اعيش هالحاله
راشد : مبارك .. شوف في هالدنيا جاد تلاقى حب ثاني ..
مبارك : مستحييييييييييييل .. مستحيل احب انسانه غير روضه .. تعرف .. انا اللين اليوم ما قلت لروضه كلمة احبج .. و الله و الله ما اقولها لانسانه في هالكون غيرها .. حتى و لو كانت روضه مب من نصيبي ..
راشد : بس يمكن في انسانه بتقولك هالكلمه ..
فهم مبارك قصد راشد ..
مبارك : راشد .. ما من بيني و بين منى شي ..
راشد : يمكن هالشي من صوبك .. بس انت ما تعرف شو من صوبها ..
مبارك : انا من اول مره رمست فيها منى .. قلتلها ان قلبي مب ملكي .. و هي تعرف اني احب روضه ..
راشد : جاد ربك .. مش يمكن منى تنسيك روضه ..؟؟..
مبارك : لا منى و لا غيرها ممكن انها تنسيني روضه .. راشد .. روضه شريان قلبي .. و حبها دم يمشي في شراييني ..
راشد : تراك اتعذب عمرك .. و اتعذب روضه بعد ..
مبارك : ااااااااااااااااااااه يا راشد ..
منع مبارك نفسه من الروحه صوب الوثبه .. بس عشان ما يلمح طيف روضه .. لانه تم يتعذب .. خلاص .. ما اقدر استحمل .. و روضه حست ببعد مبارك .. حست ان مبارك يتعمد هالشي ..
روضه : لا شمامي .. انا ادري .. ادري ان مبارك نساني ..
شما : روضه .. لا تظلمين مبارك ..
روضه : لا اظلمه ..؟؟!!!.. شما افعاله هي الي ترمس .. الحين من شهرين من رد من ألمانيا .. و لا ريناه الا مره وحده في ليوا .. من عقبها لا خبر و لا علم ..
شما : روضه انتي نسيتي وضعج اللحين ..؟؟..
روضه : بس هذا ما يمنعه ..
شما : لا يمنعه .. حشمته لهله .. و حشمته لهلج تمنعه ..
روضه : بس يا شما ..
شما : روضه .. انتي تعرفين انج ما بتكونين من نصيب مبارك .. ليش تعشمين مبارك بشي مستحيل انه يكون له ..!!!؟؟..
سكتت روضه .. و لا عرفت بشوه ترد عليها .. و في يوم كانت شما ترمس مبارك .. و قالتله عن روضه و عن رمستها ..
مبارك : اللحين هي تلومني ..؟؟؟..
شما : من حسرتها الي في قلبها يا مبارك ..
مبارك : لا و الله ؟؟.. و ظنج شو في قلبي ..؟؟..
شما : مبارك .. ممكن أسألك سؤال ..؟؟؟..
مبارك : عونج ..؟؟؟..
شما : انت فحياتك انسانه غير روضه ..؟؟..
هو فهم قصد شما .. اكيد راشد قالها عن منى ..
مبارك : انسانه غير روضه .. اممممممممم .. كيف يعني ؟؟..
شما : يعني .. انت بعت روضه عشان وحده غيرها ..؟؟؟..
مبارك : ابيع عمري و حياتي .. فدى عيون روضه ..
شما : عيل .. شو مدى العلاقه الي بينك و بين منى ..؟؟؟..
مبارك : ما من بيننا علاقه ..
شما : اها .. زين و الله .. خلاص عيل ما بطول عليك ..
مبارك : لا حول .. اللحين انتي شعندج ..؟؟..
شما : ما عندي شي ..
مبارك : شما ..
شما : ...
مبارك : لا تتوقعين في يوم اني ممكن اخون روضه .. بس لا تلوميني على أي شي اسويه ..
شما : بس روضه ما تستاهل هالشي منك ..
مبارك : شما .. لا تجذبين على عمرج .. انتي اكثر وحده تعرفين ان روضه ملك انسان غيري ..
شما : ..
مبارك : انزين قوليلي .. شو تبيني اسوي ..؟؟..
شما : ما ادري .. بس حرام عليك تحرم روضه من شوفتك ..
مبارك : شو هو .. شوف و حرقت يوف .. ؟؟!!!..
شما : مبارك .. تراك تميت قاسي ..
ليتهم يدرون بالي في قلبي .. ليتهم يحسون بالنار الي في يوفي .. جان عذروني ..
مبارك : شما .. اريدج توصلين شي حق روضه .. ممكن ..؟؟؟..
شما : اكيد ..
و بالباجر راحت شمامي حق قوم روضه .. و كانت شما و يدت روضه و ميثه و روضه يالسات في الصاله .. اول ما دخلت عليهم شما و عقب ما سلمت ..
يدت روضه : هاه شميم .. ما تبين تعرسين ..؟؟..
شما : و الله جن الا عندج معرس اباه .. ههههههههههه
يدت روضه : ودي بالستر .. مب امس خطبتج ؟؟..
روضه : بسم الله عليج يدوووه .. وين امس خطبتها .؟؟.
يدت روضه : ودي مب هي الي خطبها ولد حمد الخييلي ..؟؟..
شما حرمت محمد : لا يدووه ذيج وديمه ..
شما : جاد ايكون فالج فال خير يدووه ..
يدت روضه : انا بتخبركن .. سلطان شعنه مخر في عرسه ..؟؟..
روضه و هي تسوي حركات لميثه ..: تخبري العروووووووس ..
ميثه : الي منع بخيت من العرس .. منع سلطان ..
و من يابت طاري بخيت انجلب كيان روضه ..
يدت روضه : مالنا كلمه عالغريب .. بخيت متى ما بغى حرمته زاهبه ماشي الا يسريها ..
روضه : انا هب مستعيله عالعرس ..
يدت روضه : وووه غربلج الله .. وين هب مستعيله عالعرس ..!!!..
روضه : ما صحته و لا بصيحه ..
يدت روضه : هاي الا رمستج اليوم .. يوم هو في دار و انتي في دار .. و الا باجر من يظمج لدار .. بتباتين و تصبحين اتصيحينه ان فارقج ..
روضه بصوت واطي : صاحوه افمعشره ..
و عقب ما اذن عليهن المغرب .. نشن البنات عشان يصلن .. و نشت شمامي مع روضه صوب حجرتها عشان يصلن و في الحجره ..
شما : امممم .. عرب يسلمون عليج ..
و كانت روضه ماسكه السياده .. و من سمعت رمست شما تيبست ..
روضه : و الله صدق ..؟؟؟..
شما : و الله ..
روضه : شحاله و شاخباره .. و شو مسوي .. بخير ؟؟..
شما : بخير و نعمه .. ما يشكي باس ..
روضه : فديته .. و الله اني اشتقتله ..
شما و هي منزله راسها : و هو بعد .. مع انه يكابر في هالشي ..
روضه : اكيد يكابر .. و الا جان ما هنت عليه كل هالمده ما يسأل عني .. و لا يسير صوبنا حتى ..
شما : هو طلب مني اوصلج هالرساله ..
و ظهرت شما من مخباها ورقه و عطتها حق روضه ..
شما : هو نقلني اياها فالتيلفون عشان اوصلها لج ..
و راحت شما و فرشت سيادتها و صلت .. و روضه نشت و يلست على طرف الشبريه و قرت الورقه ..
" ليتج تفهمين قصدي ..

الا يـا مـدّعي فـيني الـنصافي... صـفا وقـتك وعني صرت جافي
وشـفت انّ الـذي ظـنّي خطا به... يـصافي وانـته الـلي ماتصافي
ثـلاث سـنين مـترقّب وصـالك... عـسى غيمك يطشطش ع الهيافي
ولـكنّك شـحيح الـوصل ظـالم... تـمـاديت وتـخـيّرت الـنكافي
تـجرعت الـمراره مـن جـنابك... وطـول الـهجر مـنّك والعسافي
وذقـت الـموت يـا موتي بغيابك... ولـيتك كـنت لـلشاجي سـعافي
تـعـايا مـن تـسابيبك خـفوقي... ولا لاقـى عـلى بـحرك مرافي
يـتـوه يـتوه واسـبابه غـرامك... ع شـط الـهم يـجرف بانجرافي
فـلا هـو نـال مـنّك مـا تمنّى... ولـنته كـنت لـجروحه مـشافي
ولا حـظّه الـردّي شفّ لصفوفه... ولا مـوته دنـا وانـهى الخلافي
بـعـد هـذا لـفاني مـا لـفاني... بـعد هـذا لـفى مـا كان خافي
لـفى لـي مـا حسب قلبي حسابه... وزلزل واعتصف روحي اعتّصافي
وشـبّ الـنار فـي قـلب المعنّى... وغـصّ بـسم مـسموم الزعافي
ودارت مــن حـواليه الـبسيطه... وضـجّ الصدر في خافي الخوافي
وخـصّوا بـالخبر ذايـع زفـافك... يـهـنوّنك عـلـى ذاك الـزفافي
زفـافك يـو مـا قـالوا زفـافك... خـطرت الـموت عقبه والحتافي
تـصّور وش هـي الـدنيا بدونك... وكـيف اقوى على اللي عاد لافي
قـتلته مـن لـعى قـربك قـتلته... قـتلته ولا لـقى مـنك نـصافي

و الله اني احبج .. بس ....
مبارك الخييلي "
( القصيده منقوله .. لشّاعر الوسمي )

قرت روضه الرساله مره و ثنتين و عشر .. خنقتها العبره من كلالامه .. و يلست تصيح .. و شما من شافت حالتها صلت الفرض و لا صلت السنه .. و ربعت صوب روضه الي تمت مكانها تقرى الرساله و تصيح .. اول مره مبارك يقولي كلمة احبج ..
شما : روضه فديتج ..
روضه : شما قالي احبج .. و يلست تصيح .. يالله فديت روحه .. حتى انا احبه .. و الله اني احبه .. دخيلج قوليله .. قوليله روضه تحبك .. حرام عليه انا ما قتلته .. انا انقتلت قبله ..
لوت شما على روضه : فديييييييييييتج و الله ..
هذا حال روضه و مبارك .. العذاب و الدموع .. كل ٍ انقتل في درب الهوى و الحب .. بعدها باسبوعين .. رجع مبارك و راشد صوب ألمانيا .. كان عنده مراجعه .. و الحمدلله .. الله شفى راشد من كل اعواقه .. سافرو اسبوع و رجعو ..
اول ما رجع راشد من المراجعه .. رمس هله و قالهم انه يبى شما ..
ام مبارك : يا ويلي يا راشد .. اسميك هب صاحي .. امس خطبنا الصغيره و اليوم تبانا نخطبلك العوده ..؟؟!!!..
راشد : امايه .. انتي ريتيها وديمه شو سوت فالمطار .؟؟!!.. لو الموت ما خذتها ..
مبارك : حشى هاي وديمه ياهل .. ما تعرف وين الله عاقنها في هالدنيا ..
ام مبارك : يا فظيحتيه عند فاطمه ..
مبارك : لا فظيحه و لا شي .. و جنج الا مستحيه من ختج .. انا برمسهم ..
ام مبارك : ادريبك .. هذا الشور شورك .. و الا راشد ما يتنقى في الحريم ..
مبارك : خليه يتنقى .. تره كل يوم بيعرس ؟؟..
و رمست ام مبارك ختها فاطمه ..
ام مبارك : يا لومي فيج يا فاطمه ..
ام شما : لا و الله يا سلامه .. انا بروحي متلومه فيج .. وديمه من ردت من المطار و هي مستلبسه .. ما تبى تعرس .. و افتظحنا فيكم .. و سيف .. حرام يالليل ما باته من اللوم ..
ام مبارك : حليلها وديمه ياهل .. ما تعرف .. شالنها هوى الدنيا ..
ام شما : هيه و الله .. و احنا ما بغينا نغصبها .. الا دام ان راشد تخير فشما دون وديمه .. مره فاله طيب .. و شما بنتكم و راشد ولدنا .. و ما بنلقالنا اخير منه ..و الحمدلله تمت الملجه على خير .. و راشد طبعا ما فيه صبر .. و اصر انه يعرس بسرعه .. و تحدد يوم العرس ..و قبل العرس بأسبوع .. في بيت قوم شمامي ..
شما : روضه قلبي يدق .. حشى احس عمري بموت ..
روضه : لا بسم الله عليج من طاري الموت يالغاليه ..
شما : ما اصدق ..
روضه : لا صدقي .. و انشالله الا يومين و بتكونين حرم راشد بن حمد الخييلي ..
شما : لا مب يومين .. 6 تيام ..
روضه : الله .. الله .. و كم ساعه و كم دقيقه بعد ..؟؟..
شما : روضوه .. دخيلج ..
روضه : ههههههههههههههههههههههه ..
شما : شو خلص فستانج ..؟؟..
روضه : لا بعده ورى باكر بيخلص ..
شما : الي مريحني انج بتكونين عندي يوم العرس ..
روضه : افا عليج .. احنا كم شما عندنا ..؟؟.. الا وحده ..
شما : فديتج و الله ..
روضه : بس شمامي .. انا لي طلب ..
شما : عونج ..
روضه : عانج الرحمن .. شمامي بدخل عندج يوم يدخلون راشد ..
شما : لا و الله ؟؟؟..
روضه : اوكي اوكي .. انا ادري ان راشد شافني ما بيظويج .. خلاص بندس فالكبت ..
شما : جب جب .. من حلاتج عاد ..
روضه : ههههههههههههههههههههه .. انزين بس بشوفكم شو تسوون ..
شما : اصلا البيت ما تدخلينه من يدخلون راشد ..
روضه : حشى يالغيره .. هههههههههههههه ..
روضه : صح شمامي بتسرين بالخميس و الا بتسرحين باليمعه ..؟؟.
شما : لا بنروح باليمعه ..
روضه : احسن .. عشان اغزيج باليمعه الصبح اخذ منج التقرير ..
قرب عرس شما و راشد و العرب مشتلين .. المناصير من صوب و قوم بالخيل من صوب .. طول الاسبوع الي قبل العرس كان مبارك و راشد غازين الوثبه .. عشان يشوفون ترتيب الخيم و الاعلام و الليتات و عثرة العرس الي ما توقف .. يوم الخميس الصبح .. تلايمو قوم بالخيل في رماح .. فبيت حمد الخييلي .. و يوهم عربان من كل دار .. و عالساعه 10 الصبح ظهرت المسيره .. و يا مكثر السيايير .. ماشالله .. كان شكل السيايير والاعلام تزينها .. صدق منظر يذبح .. كان المصور في سيارة عبيد و كان راشد في سيارته المرسدس .. و مبارك عداله بسيارته .. و من وراهم الشبيبه كلهم .. و وصلو الوثبه و كانو المناصير يرقبونهم .. كان الجو حلو .. و عمت الفرحه فالدار .. و من العصر و الحوربيه و العياله متواجدين عند خيمة الرياييل .. و من عقب المغرب ياهم محمد و سيف و ذياب بن زايد هذا غير باقي الشيوخ و العربان الي استاقو من كل دار .. و شما ظاربنها حفوز من اول اليوم .. و عالعصر يتها حنان شقير و عدلتها .. عالمغرب .. بعد ما خلصت روضه من عدلتها راحت صوب شما .. كانت روضه عذاب .. كانت لابسه مكسي وردي .. مرسوم على جسمها رسم .. و كانت راعية الصالون الي عدلتها حطتلها مكياج وردي .. و فاتحه شعرها مع تسريحه بسيطه رافعه بها كمن خصله من شعرها .. ماشالله شعرها تخطى ركبها من طوله .. اول ما خلصت اتصلت بسلطان عشان يخطفها صوب شما .. و خطفها سلطان و نزلها عند باب الفله .. دخلت روضه الفله .. جان تعق الغشوه و تروح صوب شما .. كان الجو ربشه .. البنات يرقصن و ينعشن .. و المسجل شال الدنيا .. كل البنات كانن عاقات الشيل و العبي .. و بدون منافس كانت روضه احلا بنت في العرس .. و الحق ينقال .. كانت احلا من العروس نفسها ..
شما : مالت عليج يا رويض .. و تبين تدخلين عندي انا و راشد بعد ..؟؟..
قالت وحده من البنات : يابخت بخيت بج ..
و تمن يالسات و يسولفن و يظحكن و راعية الاستيديو اتصورهن بكيمرة الفيديو .. و من عقب نشت شما و روضه معاها عشان يصورون شما و دخلن الحجره و خلن البنات في حفلتهن .. و هن يصورن شما ..
شما : روضوه فديتج عطشانه ..
روضه : فالج طيب ..
و ظهرت روضه عن شما و راحت صوب المطبخ التحظيري عشان تيب أي شي حق شما عشان تشرب .. و هي ظاهره من المطبخ سمعت صوت واحد يرمس ..
.... : لو تشوفين شكلي انتي .. حشى ميعف .. و لا جنا في عرس ..
و رجع و قال ..
.. : من اصبح و انا عند الطبابيخ ..
و في هاللحظه طاحت عين روضه على هالانسان الي يرمس .. و المشكله ان هو نفسه شافها .. و من شافها عرفها و تيبس الريال ..ماقدر انه يرمس او حتى يتحرك .. و روضه فاجه ثمها .. و نست انها بلا شيله و لا عباه ..

...*** اربع ... اربع حروف و يزيد حبي... اربع حروف و ايفز قلبي... انت الغلا ميزك ربي ... قلبي انا منك صويبي***..

حاولت روضه انها تتحرك او انها تسوي أي شي بس ما قدرت .. كانت صدمتها عوده .. و مبارك من شاف روضه تيبس .. هو تيبس من حلاتها .. ماقد حلم بأنه يشوف روضه .. و اللحين و هو يشوفها .. جنه يشوف ملاك من السما .. آيه من الجمال مرسومه في هيأة انسان .. كان يشوف روضه و جنه يشوفها لأول مره في حياته .. و هذي هي الحقيقه .. اول مره مبارك يشوف روضه .. و في هاللحظه نسى بخيت و نسى منى و نسى ذا الكون كله .. كل الي يشوفه اللحين .. هالغزال المنصوري الي سلب قلبه .. تم مبارك واقف و روضه واقفه .. بس تفاجأ بدمعه تنزل من عين روضه ... و في هاللحظه ..
مبارك : انزين برايج اللحين .. و سكر التيلفون بدون ما يعطي مجال للي على الخط انها ترمس ..
و روضه ميته ..يالله مبارك يرمس وحده .. لا و بكل قوة ويه .. يكلمها جدامي بعد .. و مبارك ما يدري .. و لا هب حاس بعذاب روضه .. يالله يالقدر .. اذا مبارك الي يحبني ذاك الحب .. يرمس وحده ..عيل بخيت شو بيسوي ؟؟..!!... يالله .. ليتني مت قبل ما اسمعه و هو يرمسها ..
رر